السلام عليكم ورحمة الله وبركاته وبسم الله الرحمن الرحيم .. التحية ليكم للشعب السوداني للشفاته والكنداكات وقبل ابدا اتكلم معاكم بقول ليكم ياجماعه ... لو ماجيت من زي ديل وااا اسفاي وااامآستي وااااذلي... ماداير اطول عليكم عارف انكم بتشكو من الجوع والمرض وشتى انواع العوز باختصار انا ياجماعه مازي مابروجو ليكم والله مازعلان والعملتوه ده صاح ولا خطأ في النهاية دي قناعاتكم ... دي مطالبكم ده السعيتو لتحقيقه والحمدلله ربنا وفقكم...
لو في زعل فعشان حال البلد المالقت راجل يقدر جهدكم وتضحياتكم ياخد بيدكم يقدم البلد دي خطوة واااحدة لي قدام زي ماكنتو بتتمنوا .... زعلان علي الخراب.. زعلان علي الدمار.... زعلان علي اختلاط الحابل بالنابل لكن برجع واقول يا جماعه الله موجود وباذنه تعالي حتتخطي البلد المصائب دي وترجع تقيف علي حيلها..
نحن صاح قصرنا واذنبنا في حقكم عن قصد او بدون صاح قصرنا في حق البلد ... لكن ياجماعه من اكبر اخطآنا انه ماوعيناكم امكن تباطؤ وامكن استهتار بس لكن مامشكلة هسه تسمعو وتعرفوا العايز اقولو ليكم ..
نحن مع اشكال التقصير الظاهر الخلفناه ده ده الكان في مقدراتنا عملنا البنقدر عليه ونحن تحت الحصار والحروب وشتي انواع الفتن... لكن اكتر حاجة كنت مستغرب ليها انه القحاته ومن شايعهم بعد غشوكم والبلد غلبتهم بقو يقولو ليكم ده بسبب الانقاذ دي تركة البشير والاسلاميين هم الناس ديل جو ينقذونا من شنو ؟؟؟
ياجماعه في عاقل بصدق الكلام ده !! حاوريكم الليله نحن انقذانكم من شنو وتركتنا وبحمدلله كانت كباري... طرق.. سدود.. تركتنا كانت جياد.. الصافات... المدارس المنتشره .. الجامعات... المستشفيات.. الامن... تركتنا كانت عيشه بجنيهين.. طلب فول بخمسة جنيهات شوال سكر ب 1000 جنيه ... تركتنا بترول... دهب... وقود الجالون ب28 جنيه !!
ومافي داعي اعدد لانه تركتنا اهديييك قدام عيونك بتدمروا فيها يوم بعد يوم... وبقول لا من ولا تفضل دي ابسط حقوقكم انا عارف لكن ماكملنا جميلنا عارفين لي يا جماعه... ايوه العماله والخيانه... وحاقول ليكم جينا عشان ننقذكم من شنو...
انتو كشباب صغار امكن معظمكم ماعارفين الكان حاصل في البلد دي قبل نحن نجيها استغلو تقصرينا في تبصيركم وبقو يقولوا ليكم الانقاذ فصلت الجنوب لكن ماقالو ليكم انه الانقاذ اوقفت اطول حرب في افريقيا ومن تاريخ الاستقلال ....
ايوه حرب الجنوب الانقاذ جابت جون قرنق ولما بدأ يعم السلام الحصل شنو ياجماعه ماعارفين (قتلوه)....
قتلو جون قرنق رجل السلام قتلوه عشان البلد ماتستقر ...عشان مايحسب بمفاهيمهم الضيقه انتصار للانقاذ وسكتو علي كده ابدا... فتحو لينا جبهة اكبر في دارفور قتل وتشريد وقالو ليكم البشير بقتل في شعبه ... البشير شغال تطهير عرقي .. البشير بهجر في الفور.. طيب ياجماعه لو افترضنا الكلام ده صاح وصاحب العقل يميز لي انتظرنا لي 2003 لي مابدينا من بداية التسعينات في زول بصدق الكلام الفارغ ده ... ؟؟
الناس ديل وفي رحلة كيدهم الطويله الممتده ضد البلاد وحملات التشكيك قالو ليكم البشير فصل الجنوب...
ياجماعه حق تقرير المصير موجود في المواثيق حق اصيل الحصل انه الجنوبيين اتغشو زي ماغشوكم القحاته والدليل اغلبهم ماقعد في الجنوب غير ساعات مالم جو راجعين جوبا بقت ليهم غريبه مقارنه مع الخرطوم وانسان السودان وده والامن والسلام العندنا ... وده براااااو شنو ياجماعه دليل براءة ولا ماكده ؟؟ لكن السؤال المهم هل عاملناهم معامله غير كريمه ؟؟ هل فضلنا اولاد البلد عليهم لا ياجماعه عارفين ليه لانه دي شيم السوداني الاصيل شيمة ودالبلد الحقيقي ولأنه نحن عاملانهم من بدرييي مواطنين اصيلين قبل مايغشوهم وده حقهم ....
قالو ليكم البشير واسرته استولوا علي السلطة والثروة نسو انه البشير لما مسك البلد دي جاها من الخنادق .. ما من كابريهات كندا ولاملاهي نيويورك اوبارات باريس او دهاليز الامم المتحده عشان يحرم شعبه...
اقول ليكم نحن جينا ننقذكم من شنو ؟؟ اسألوهم اول لي ماقالوا ليكم انه الانقاذ لمن استلمت البلد دي التمرد كان غاب قوسين او ادنى من ابتلاع الخرطوم ... لي ماقالوا ليكم انه صابون الحمام والعيش كان بتباع علي عدد افراد الاسرة بدون اي زيادة.. لي ماقالوا ليكم انه كانوا بشربو الشاي بالعسل والبلح .. والسكر المكعبات.. لي ماقالو ليكم الخرطوم كان فيها تلاته جامعات واربعه مدارس ثانوية وتلاته مرحلة اساس لا رياض اطفال ولايحزنون ... لي ماقالو ليكم انه التلفونات المنتشره حتي عند الحيوانات وثورة الاتصالات كانت في عهدالانقاذ .. لي ماقالو ليكم انه مغترب الخليج كان بعمل مسكول عشان انت ترجع ليه عرفتو انقذانكم من شنو ولا لسه ..
قالو ليكم العنوا وسبوا الكيزان لكن ياجماعه البتفاصحو ديل ماقالوا ليكم... لما اشتدت حرب الجنوب الكانو بطلعو ليها هم الكيزان.. ماقالو ليكم وهم طلبه كانوا بقرو و(بخلطو) وبتسكعو في شوارع الخرطوم للصباح لانه الامن موفرنو الكيزان.. ماقالو ليكم انه الانقاذ عشان المواطن ينوم مطمئن قدمت ارتال، من الشهداء من خيرة ابناء الوطن قدمت الظابط والمهندس والدكتور والمعلم والموظف والعامل والخفير...
الانقاذ قدمت الزبير محمد صالح.. قدمت عبيد ختم.. قدمت وداعة الله ابراهيم .. محمد احمد عمر.. المكحل بالشطه.. قدمت ابراهيم شمس الدين.. ابراهيم تاج الدين ..علي عبدالفتاح...د. عوض عمر... وجيش جرار من شهداء الحركة الاسلامية قدموا اراوحهم رخيصة عشان عز البلد وامن البلد دي.... ياجماعه صفحة الانقاذ صفحة نااااصعه في تاريخ السودان اتجسدت فيها كل معاني التفاني والاخلاص وبذل الدم والعرق.... وبقول ليكم ده من اوجب واجبات الانقاذ ورجال الانقاذ ونساء الانقاذ وابناء الانقاذ لامن ولا تفضل ولا حسره .. وقبل الختام قلتها قبل كده وبقولها تاني وتالت نحن مابندسه ولما نموت بنموت زي النخل واقفين والدايرو منكم فتحو عيونكم وابقوا عشره علي البلد...
ااااالله اكبر اااااله اكبر لا اله الا الله.. ولانعبد الا اياه.. مخلصين له الدين.. ولو كره الكافرون ولو كره المرجفون
في سبيل الله قمنا نبتقي رفع اللواء... لاااا لدنيا قد عملنا.. نحن للدين فداء... فاليدم للدين عزه او ترق كل الدماء
السلام عليكم
متداول على نطاق واسع على مواقع التواصل.. لم نعرف مدى صحته
تعليقات
إرسال تعليق